Jólakveðja og Fréttaskot 21.12.2015
Markaðsstofa Norðurlands óskar þér gleðilegar jóla og farsældar á komandi ári.
Skrifstofa MN mun loka á milli jóla og nýárs. Síðasti starfsdagur jól er 22. desember og við opnum svo aftur 4. janúar.
Árið 2015 hefur verið viðburðaríkt fyrir ferðaþjónustuna.
Atvinnuvega- og nýsköpunarráðuneytið og SAF kynntu vegvísi í ferðaþjónustu sem er grunnur að heildarstefnumótun til framtíðar fyrir greinina. Stjórnstöð ferðamála var stofnuð til að fylgja þessu verkefni eftir næstu 5 árin. Við bindum vonir við að þessi vinna muni skila heildstæðari stefnu og aðkomu hins opinbera að þessari stóru og mikilvægu atvinnugrein, sem hefur svolítið setið á hakanum undanfarin ár.
Forsætisráðuneytið skipaði starfshóp til þess að koma með tillögur að hvernig mætti efla millilandaflug um Akureyrar- og Egilsstaðaflugvöll. Nefndin skilaði af sér tillögum sem fela í sér að fjárfesta í að opna nýjar fluggáttir til landsins og ríkisstjórnin er búin að samþykkja að vinna eftir. Málið er nú í höndum Atvinnuvega- og nýsköpunarráðuneytisins og væntum við þess að fljótlega verði hægt að sækja formlega um stuðning við ný flug á viðkomandi flugvelli. Það myndi gjörbreyta samningsstöðu okkar gagnvart flugrekstraraðilum og auka mjög líkur á árangri í þessu afar stóra verkefni sem er hagsmunamál okkar allra.
Lonely Planet valdi Akureyri sem besta áfangastaðinn í Evrópu árið 2015. Grundvöllurinn fyrir slíku vali er allt það góða sem við höfum að bjóða hér á Norðurlandi – fallega náttúru, góða þjónustu, fjölbreytta afþreyingu, vinalegt viðmót o.s.frv. Þetta er klapp á bakið fyrir ferðaþjónustuna á svæðinu og við getum öll verið stolt af þessum árangri.
Ferðaþjónusta á Norðurlandi er í stöðugum vexti og þróun – fyrirtækjum fjölgar, sum stækka við sig og nýjungar spretta upp. Á Siglufirði var opnað nýtt hótel, Sigló hótel, Sel - hótel Mývatn stækkaði við sig og unnið er að stækkun á Fosshótel Húsavík. Lýtingsstaðir byggðu torfhús uppá gamla mátann, hesthús og skemmu, sem eru afar skemmtileg viðbót í flóruna. Hvalaskoðun verður sífellt vinsælli og margt í gangi þar. Húsavík Adventures hóf hvalaskoðun á Húsavík í sumar og Norðursigling hefur sópað til sín viðurkenningum fyrir rafknúinn drifbúnað í skonnortunni Opal. Ambassador á Akureyri kynnti á dögunum nýjan bát sem þeir bæta við á næsta ári. Nýlega bættust í hóp samstarfsfyrirtækja MN fyrirtækin Elding og Whale Safari sem munu bjóða upp á hvalaskoðun frá Akureyri á næsta ári.
Þess ber að geta að hér er stiklað á stóru um nýjungar á árinu, en þessi listi er hvergi nærri tæmandi.
Við minnum svo alla samstarfsaðila okkar á að senda okkur upplýsingar um breytingar eða nýjungar fyrir útgáfu næstu bókar North Iceland Tourist Guide, hana má sjá hér www.nordurland.is/is/ferdalagid/baeklingar. Vinsamlegast sendið allar slíkar upplýsingar á netfangið info@nordurland.is , því fyrr því betra.