Super Break í samningaviðræðum við nýtt flugfélag

Breska ferðaskrifstofan Super Break, sem hefur undanfarnar vikur komið með um 2500 breska farþega til Akureyrar, áformar nú að nota enn öflugri og stærri flugvél fyrir Norðurlandsferðirnar en verið hefur.

Samningaviðræður standa nú yfir, en Chris Hagan verkefnastjóri hjá Super Break, segir það hafa komið í ljós að flugvélin sem pólska flugfélagið Enter Air hefur notað sé ekki nægjanlega öflug. Því hafi verið leitað til annars flugfélags um að sjá um ferðir Super Break til Akureyrar, sem hafi nú þegar átt í samskiptum við Icelandair, Air Iceland Connect og fleiri um aðstæður á Akureyrarflugvelli. Forsvarsmenn þess ætli að tryggja að hægt verði að lenda á Akureyri í langflestum tilvikum og mun oftar en raunin varð í vetur. 

Hagan sagði frá þessu í viðtali við Markaðsstofuna, þar sem hann fór yfir það hve góðar móttökur bæði starfsfólk Super Break og viðskiptavinir hafi fengið á Norðurlandi. Hann segir þetta ekki jafnast á við nokkuð annað sem hann hafi séð í ferðaþjónustu. Hægt er að sjá viðtalið hér að neðan.