Húnaþing Vestra

Verkefni 1: Uppbygging áfangastaða á Vatnsnesi

Markmiðið er að mæta sífellt auknum áhuga ferðafólks á Vatnsnesi. Framkvæmdir við veginn fyrir Vatnsnes eru á samgönguáætlun næstu ára. Vegurinn er jafnframt hluti af Norðurstrandarleið. Því má búast við aukinni umferð á komandi árum. Áherslan er því sett á að byggja upp áningarstaði á nesinu í samstarfi við landeigendur. Um er að ræða staði sem tengjast sögu, menningu og náttúruupplifun s.s. sela- og fuglaskoðun og eru þegar farnir að draga að sér gesti þó ekki hafi verið ráðist í uppbyggingu þar. Er því um að ræða mikilvægt verkefni til að koma í veg fyrir náttúruspjöll og jafnframt til að gæta öryggis ferðamanna. Um er að ræða kortlagningu nýrra áfangastaða og uppbyggingu á þeim helstu stöðum sem ferðamenn hafa viðkomu í dag svo sem (ekki tæmandi listi): A)Illugastaðir, B) Svalbarð, C) Flatnefsstaðir, D) Tjörn, E) Hamarsrétt, F) Ánastaðastapi og G) Skarðsviti. Einungis á þeim fyrstnefnda hefur til þessa verið einhver markviss uppbygging. Jafnframt verður farið í uppbyggingu við Hvítserk og Borgarvirki sem eru staðir á landsáætlun. Skoðaðir verði fleiri hugsanlegir áfangastaðir.
Helstu verkliðir: A) Kortlagning áfangastaða í samvinnu við landeigendur, B) Forgangsröðun uppbyggingar, C) Deiliskipulag viðeigandi staða, D) Styrksumsóknir, E) Framkvæmdir í takt við forgangsröðun

Verkefni 2: Borðeyri

Markmið verkefnisins er uppbygging Borðeyrar sem áfangastaðar. Unnið verði að útfærslu og þróun í kjölfar skilgreiningar „verndarsvæðis í byggð“, þar sem unnið verði með þá möguleika, sem saga og forn húsakostur bjóða upp á, auk þess að möguleikar til náttúruskoðunar og sögutengds viðburðahalds verði efldir.
Helstu verkliðir: A) Hönnun og deiliskipulag svæðisins, B) Forgangsröðun verkefna, C) Styrksumsóknir, C) Framkvæmdir í takt við forgangsröðun svo sem: Uppsetning náttúrulaugar við Borðeyri og uppsetning fuglaskoðunarstaðar á eða í jaðri Borðeyrar.

Verkefni 3: Stígakerfi

Markmið verkefnisins er samtenging þéttbýlisstaðanna á Laugarbakka og Hvammstanga við útivistarsvæði í Kirkjuhvammi ofan Hvammstanga með göngu- og hjólastígum. Slík samtenging eykur líkur á því að ferðamenn staldri lengur við og njóta náttúru sveitarfélagsins. Um öryggismál er að ræða þar sem fólk gengur/hleypur og hjólar á umferðarmiklum akbrautum í dag. Mikill fjöldi ferðamanna dvelur á Hótelinu á Laugarbakka og skortir tengingar þaðan við Hvammstanga. Stígakerfið mun liggja frá Laugarbakka að Hvammstanga og tengja saman þjónustukjarna sunnan megin í bænum við hafnarsvæðið þar sem eru verslanir, veitingastaðir og Selasetrið. Þaðan verður tenging við útivistarsvæðið í Kirkjuhvammi styrkt en þar er tjaldsvæði að finna. Með þessu er svæðið eflt sem upphafspunktur Norðurstrandarleiðar. Jafnframt verður skoðuð uppbygging grunnþjónustu (WC) e.t.v. í samvinnu við Selasetrið og gönguleiða meðfram ströndinni til norðurs, þaðan sem oft má sjá seli og jafnvel hvali.
Helstu verkliðir: A) Hönnun stígakerfis í samvinnu við landeigendur þar sem það á við, B) Deiliskipulag, C) Styrksumsóknir, D) Framkvæmdir.

Verkefni 4: Kolugljúfur

Markmið verkefnisins er uppbygging aðstöðu fyrir ferðamenn við Kolugljúfur til að bæta öryggi ferðamanna. Kolugljúfur með sínum tilkomumiklu fossum er fyrir löngu orðið eitt af kennileitum svæðisins og sennilega einn fjölfarnasti áningastaður ferðafólks í sveitarfélaginu sunnan hringvegar. Staðurinn er farinn að sýna merki átroðnings og skemmdir eru orðnar á náttúru. Um mikið öryggismál er að ræða vegna aðstæðna við gljúfrin og mikillar fallhættu víða á svæðinu. Mikilvægt er að ljúka uppbyggingu og frágangi á svæðinu til að mæta aukinni umferð og bæta öryggi. Deiliskipulag liggur fyrir.
Helstu verkliðir: A) Leggja göngustíg að núverandi útsýnispalli austan megin gljúfra (styrkur liggur fyrir), B) Fullnaðarhönnun svæðisins í samvinnu við landeigendur, C) Forgangsröðun verkefna, útsýnispalla og stíga, D) Styrksumsóknir, E) Framkvæmdir.

Verkefni 5: Reykir í Hrútafirði

Markmið verkefnisins er uppbygging svæðisins á Reykjum í Hrútafirði sem áfangastaðar. Um er að ræða svæðið við Byggðasafn Húnvetninga og Strandamanna annars vegar, sem um leið er fuglaskoðunarstaður og hins vegar við náttúrulaug norðan megin við skólabyggingar. Með því fær svæðið viðameira hlutverk fyrir ferðafólk á heilsárs grundvelli. Samhliða þessu má hugsa sér að gera meira úr þeim minjum, sem tengjast veru breska setuliðsins á svæðinu og byggja upp frekari þjónustu á tanganum.
Helstu verkliðir: A) Deiliskipulag og hönnun, B) Forgangsröðun verkefna og gerð verkáætlunar, C) Styrksumsóknir, D) Framkvæmdir í takt við forgangsröðun.