Kálfshamarsvík er ein af leyndu perlum Norðurstrandarleiðar. Þar er stórkostlegt stuðlaberg og fallegur viti en jafnframt á Kálfshamarsvík sem mikla sögu og er hægt að sjá gamlar leifar af þorpinu sem þar stóð eitt sinn. Keyra áfram Skagann og njóta þess að vera einn í heiminum, stoppa og njóta stórkostlegs útsýnis og landslags. Rétt áður en komið er á Sauðárkrók er gaman að stoppa við Grettislaug. Þar er hægt að leggjast í laugina og láta þreytuna líða úr sér, eða einfaldlega njóta stundar og staðar í firðinum fagra.
Það er notalegt að stoppa á Sauðárkrók og þar er fjölbreytt þjónusta. Hægt er að fara í bátaferðir útí hina fögru Drangey, kíkja á söfn eða njóta annarrar afþreyingar. Brekkurnar fyrir ofan bæinn kallast Nafir og eru fornir sjávarkambar. Á Nöfunum er útsýnisskífa þar sem hægt er að njóta þess að horfa yfir fjörðinn. Ótal gönguleiðir er að finna á Sauðárkróki og nágrenni og enginn ætti að missa af hinni tæplega 4km löngu sandfjöru sem er austan við bæinn, Borgarsandi.
Hótel og gistiheimili eru á Sauðárkrók og nágrenni.
Skagafjörður er þekktur fyrir að vera mekka íslenska hestsins og ef þið hafið áhuga á hestaferðum þá eruð þið sannarlega á réttum stað. Margar hestaleigur er að finna í Skagafirði með fjölbreyttu úrvali af styttri og lengri ferðum.
Í Skagafirði eru fyrirtæki sem bjóða uppá flúðasigingar, tilvalið fyrir þá sem leita eftir meiri spennu í líf sitt og er mikið fjör fyrir alla fjölskylduna. Það eru mismunandi leiðir í boði, allt eftir reynslu og áhuga hvers og eins.
Í Varmahlíð og nágrenni er næg gisting í boði, hvort sem það er hótel, gistiheimili, sumarhús, tjaldsvæði eða bændagisting. Einnig er veitingastaður á Hótel Varmahlíð.
Hofsós á sér langa og áhugaverða sögu. Þar er stuðlabergið gríðarlega fallegt og eitthvað sem enginn má láta framhjá sér fara. Ekki má gleyma sundlauginni sem er sögð sú fegursta á landinu.
Nokkrir fallegir áningastaðir eru á leiðinni til Siglufjarðar þegar keyrt er áfram og útsýnið stórkostlegt þar sem snarbrött fjöllin mæta opnu hafi.
Hægt er að gista í Fljótunum en einnig hægt að keyra til Siglufjarðar þar sem eru gistiheimili og hótel.
