Topp tíu: Fjölskyldan á ferðalagi

Norðurland er fyrir alla fjölskylduna. Það getur verið krefjandi að ferðast um með börn á mismunandi aldri en á Norðurlandi ættu allir að geta fundið eitthvað við sitt hæfi og prófað nýja afþreyingu.

• Hvalaskoðun er orðin ein helsta afþreying ferðamanna á Norðurlandi. Við hvetjum ykkur til að fara um borð í bát, sigla um fallega landið okkar og njóta þess að fylgjast með villtum dýrum í sínu náttúrulega umhverfi. Sum hvalaskoðunarfyrirtæki bjóða jafnframt uppá sjóstangaveiði sem er frábær skemmtun fyrir fólk á öllum aldri. 
• Hægt er að heimsækja húsdýragarða og bóndabæi og fá þannig að kynnast lífinu í sveitinni. Smakka mat úr héraði og fá að klappa dýrunum.
• Sæþotur, kayak og róðrabretti er hin fullkomna afþreying fyrir foreldra og unglinga. Þetta eru ævintýralegar ferðir og einstaklega hressandi fyrir alla að komast út á sjó og njóta kyrrðarinnar.   
• Hellaskoðun er ævintýri sem allir hafa gaman af. Þeir eru misstórir og djúpir en allir eiga það sameiginlegt að vera heillandi heimar, engu öðru líkir.
• Jeppa - og rútuferðir uppá hálendi er ógleymanleg lífsreynsla.
• Ótal hestaferðir eru í boði á Norðurlandi, bæði styttri og lengri ferðir og jafnt fyrir vana sem óvana. Enginn ætti að ferðast um Ísland án þess að njóta gæða íslenska hestsins.
• Það er áskorun fyrir alla fjölskylduna að prófa eins margar sundlaugar á Norðurlandi og hægt er. Margar þeirra eru með virkilega skemmtilegum rennibrautum. Svo eru það auðvitað allar heitu laugarnar og böðin; Grettislaug, Sjóböðin, Bjórböðin, Jarðböðin, heitu pottarnir á Hauganesi og fleira. 
• Strendurnar á Norðurlandi eru fjölmargar og skemmtilegar, margar með fallegum svörtum sandi á meðan aðrar skarta sjóklettum og miklu fuglalífi. Það er svo gaman að rölta um og oft á tíðum er hægt að finna allskonar fjársjóði í nálægð við sjóinn. 
• Upplifið einn stærsta bardaga Íslandssögunnar í gegnum sýndarveruleika á Sauðárkrók, farið um borð í bát á Síldarminjasafninu, kíkið inní einn af gömlu torfbæjunum sem hafa varðveist svo vel, mátið skóna hans Jóhanns risa á Dalvík, skoðið beinagrind af stærsta dýri jarðar á Húsavík. Fjölmörg skemmtileg söfn, sýningar og setur er að finna um allt Norðurland.